Azərbaycan Texnologiya Universiteti (ATU) və Azərbaycan Respublikasının Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin birgə təşkilatçılığı ilə “Mədəni irsin qorunması” mövzusuna həsr edilmiş tədbir keçirilib.
ATU-da baş tutan tədbirdə universitetin sosial məsələlər və ictimaiyyətlə əlaqələr üzrə prorektoru Şahmar Həsənov, Mədəni İrsin Qorunması, İnkişafı və Bərpası üzrə Dövlət Xidmətinin Gəncə Regional İdarəsinin mütəxəssisi Xəlil İbrahimov, Gəncə Şəhər İcra Hakimiyyəti başçısı Aparatının Şəhərin mədəni irsinin qorunması şöbəsinin müdiri Yadigar Bədəlov, aidiyyəti dövlət qurumlarının nümayəndələri, universitetin akademik heyəti və tələbələr iştirak edib.
Təbdbirdə Gəncə şəhərinin zəngin mədəni irsi ilə xalqımızın milli sərvətlərinin qorunmasına verdiyi töhfələrdən, işğaldan azad olunmuş ərazilərdə dağıntılara məruz qalmış tarixi abidələrdən, dövlət mühafizəsində olan tarixi və mədəniyyət abidələrinin qorunması işinin təşkilindən bəhs edilib, tarix və mədəniyyət abidələrinin qorunması, tədqiqi və onlardan istifadə edilməsi mövzusunda slaydlar təqdim olunub.
