Azərbaycan Respublikasında qeyri-neft sektorunun inkişafı dövlət siyasətinin əsas istiqamətlərindən biri kimi müəyyən edilmişdir. Bu baxımdan kənd təsərrüfatı sahəsinin inkişafı, ərzaq təhlükəsizliyinin möhkəmləndirilməsi, regionlarda məşğulluğun artırılması və ixrac potensialının genişləndirilməsi xüsusi əhəmiyyət daşıyır. Prezident İlham Əliyevin kənd təsərrüfatı məsələlərinə həsr olunmuş müşavirədə səsləndirdiyi fikirlər və verdiyi tapşırıqlar da bu sahənin ölkə iqtisadiyyatındakı strateji rolunu bir daha nümayiş etdirmişdir. Dövlət başçısı müşavirədə qeyd etmişdir ki, kənd təsərrüfatı yalnız iqtisadi sahə deyil, həm də sosial rifahın təmin edilməsində mühüm vasitədir. Azərbaycanın əhalisinin əhəmiyyətli hissəsi kənd yerlərində yaşayır və onların əsas gəlir mənbələrindən biri məhz kənd təsərrüfatıdır. Buna görə də aqrar sektorun inkişafı regionların sosial-iqtisadi tərəqqisinə, yeni iş yerlərinin yaradılmasına və əhalinin həyat səviyyəsinin yüksəlməsinə birbaşa təsir göstərir. Son illər ölkədə kənd təsərrüfatının inkişafı istiqamətində genişmiqyaslı islahatlar həyata keçirilmişdir. Fermerlərə subsidiyaların verilməsi, müasir texnikanın lizinq yolu ilə təqdim olunması, suvarma sistemlərinin yenilənməsi və aqrar sahədə rəqəmsal idarəetmə mexanizmlərinin tətbiqi bu siyasətin əsas istiqamətlərini təşkil edir. Prezident İlham Əliyev müşavirədə bu tədbirlərin müsbət nəticələr verdiyini vurğulayaraq, əldə olunan nailiyyətlərlə kifayətlənməməyin vacibliyini qeyd etmişdir.
Müşavirədə ərzaq təhlükəsizliyi məsələsi xüsusi diqqət mərkəzində olmuşdur. Qlobal miqyasda baş verən iqtisadi və siyasi proseslər, iqlim dəyişiklikləri və beynəlxalq bazarlarda qiymət dalğalanmaları göstərir ki, hər bir ölkə öz daxili istehsal imkanlarını artırmalıdır. Prezident İlham Əliyev vurğulamışdır ki, strateji ərzaq məhsulları üzrə özünütəminetmə səviyyəsinin yüksəldilməsi dövlətin qarşısında duran əsas vəzifələrdəndir. Bu məqsədlə əkin sahələrinin genişləndirilməsi, məhsuldarlığın artırılması və müasir aqrotexniki üsulların tətbiqi daha da sürətləndirilməlidir.
Kənd təsərrüfatında su təminatı məsələsi də müşavirənin əsas mövzularından biri olmuşdur. Məlumdur ki, su ehtiyatlarından səmərəli istifadə aqrar istehsalın dayanıqlılığında mühüm rol oynayır. Son illərdə ölkədə yeni su anbarlarının tikilməsi, meliorasiya və irriqasiya layihələrinin həyata keçirilməsi bu sahədə əhəmiyyətli irəliləyişlərə səbəb olmuşdur. Bununla belə, mövcud çağırışlar daha müasir yanaşmaların tətbiqini tələb edir. Dövlət başçısı aidiyyəti qurumlara su itkilərinin minimuma endirilməsi və damcı suvarma kimi innovativ texnologiyaların geniş tətbiqi ilə bağlı tapşırıqlar vermişdir.
Müşavirədə kənd təsərrüfatı məhsullarının ixrac potensialının artırılması məsələləri də geniş müzakirə edilmişdir. Azərbaycan bir sıra kənd təsərrüfatı məhsullarının istehsalında və ixracında mühüm üstünlüklərə malikdir. Meyvəçilik, tərəvəzçilik, pambıqçılıq, üzümçülük və fındıqçılıq kimi sahələr ölkənin ixrac gəlirlərinin artırılmasında mühüm rol oynayır. Prezident İlham Əliyev qeyd etmişdir ki, yerli məhsulların beynəlxalq bazarlarda rəqabət qabiliyyətinin yüksəldilməsi üçün keyfiyyət standartlarına ciddi əməl olunmalı, logistika imkanları genişləndirilməli və yeni bazarlara çıxış təmin edilməlidir. Aqrar sahənin inkişafında innovasiyaların rolu da xüsusi vurğulanmışdır. Müasir dövrdə kənd təsərrüfatında yüksək məhsuldarlığa nail olmaq üçün rəqəmsal texnologiyaların tətbiqi böyük əhəmiyyət daşıyır. Elektron kənd təsərrüfatı sistemləri, peyk monitorinqi, ağıllı suvarma texnologiyaları və müasir laborator xidmətlər fermerlərin fəaliyyətini daha səmərəli edir. Dövlət başçısı bu istiqamətdə həyata keçirilən layihələrin davam etdirilməsinin vacibliyini qeyd etmiş və innovativ yanaşmaların genişləndirilməsini tövsiyə etmişdir.
İşğaldan azad olunmuş ərazilərdə kənd təsərrüfatının inkişafı da müşavirədə diqqət çəkən məsələlərdən biri olmuşdur. Qarabağ və Şərqi Zəngəzur iqtisadi rayonları zəngin torpaq və su ehtiyatlarına malikdir. Bu ərazilərdə müasir kənd təsərrüfatı infrastrukturunun qurulması, aqroparkların yaradılması və yüksək məhsuldar istehsal sahələrinin təşkili ölkənin ümumi aqrar potensialını əhəmiyyətli dərəcədə artıracaqdır. Cənab Prezident İlham Əliyev həmin ərazilərin “ağıllı kənd” və “ağıllı təsərrüfat” konsepsiyaları əsasında inkişaf etdirilməsinin vacibliyini vurğulamışdır.
Fermerlərin sosial müdafiəsi və dövlət dəstəyi tədbirləri də müşavirədə müzakirə olunmuşdur. Dövlət tərəfindən verilən subsidiyalar, güzəştli kreditlər və digər maliyyə mexanizmləri kənd təsərrüfatı istehsalçılarının fəaliyyətinə mühüm stimul verir. Prezident qeyd etmişdir ki, bu dəstək tədbirləri daha şəffaf və səmərəli şəkildə həyata keçirilməli, hər bir fermer dövlət proqramlarından bərabər şəkildə yararlana bilməlidir.
Nəticə etibarilə, Azərbaycan Respublikasının Prezident İlham Əliyevin kənd təsərrüfatı məsələlərinə həsr olunmuş müşavirəsi aqrar sektorun inkişafının dövlət siyasətində mühüm yer tutduğunu bir daha göstərmişdir. Müşavirədə səsləndirilən fikirlər və verilən tapşırıqlar kənd təsərrüfatının modernləşdirilməsi, ərzaq təhlükəsizliyinin möhkəmləndirilməsi, ixrac imkanlarının genişləndirilməsi və regionların davamlı inkişafı baxımından mühüm əhəmiyyət daşıyır. Həyata keçirilən islahatlar və dövlət dəstəyi tədbirləri nəticəsində Azərbaycan kənd təsərrüfatının yaxın illərdə daha yüksək inkişaf mərhələsinə qədəm qoyacağı gözlənilir. Bu isə həm ölkə iqtisadiyyatının şaxələndirilməsinə, həm də vətəndaşların rifahının yüksəlməsinə mühüm töhfə verəcəkdir.
Azərbaycan Texnologiya Universiteti
Sosial məsələlər və ictimaiyyətlə əlaqələr üzrə prorektor
Şahmar Umud oğlu Həsənov
Azərbaycan Texnologiya Universitetində (ATU) 2025–2026-cı tədris ilinin yaz semestrinin imtahan sessiyasına start verilib.
Universitetin rektoru Yaşar Ömərov imtahanların keçirildiyi auditoriyalarda olub, prosesin gedişi ilə yerində tanış olub. Rektor tələbələrlə görüşərək onların fikirlərini dinləyib, imtahanların təşkili ilə bağlı tövsiyələrini verib və onlara uğurlar arzulayıb.
Qeyd edək ki, 2 iyul 2026-cı il tarixinədək davam edəcək sessiya müddətində imtahanlar test və yazılı formada keçiriləcək. İmtahanların şəffaf və obyektiv təşkili məqsədilə universitetdə İmtahan Qərargahı və Apellyasiya Komissiyası fəaliyyət göstərir. Tələbələrin müraciətlərinin operativ araşdırılması üçün bütün tədris korpuslarında təklif və şikayət qutuları da yerləşdirilib, həmçinin elektron müraciətlər üçün QR kod istifadəyə verilib.
🤖 Azərbaycan Texnologiya Universitetində (ATU) cari imtahan sessiyasından başlayaraq imtahan prosesində süni intellekt əsaslı innovativ həllər tətbiq ediləcək.
ATU-da tədris və qiymətləndirmə proseslərinin rəqəmsallaşdırılması istiqamətində növbəti mühüm addım atılaraq innovativ süni intellekt əsaslı İmtahan Portalı pilot layihə kimi istifadəyə verilib.
Hazırda platforma iki əsas modul üzrə fəaliyyət göstərir:
📝 Yazılı imtahan modulu – pilot layihə olaraq Rəqəmsal texnologiyalar fakültəsinin I kurs tələbələri üçün tətbiq olunur və bu mərhələdə imtahan prosesi auditoriyada rəqəmsal platforma üzərindən aparılacaq. Platforma vasitəsilə bilet əsaslı imtahan cavabların süni intellekt tərəfindən operativ qiymətləndirilməsi və nəticələrin dərhal təqdim olunması nəzərdə tutulur.
🤖 Test imtahanı modulu – bütün fakültələrin tələbələri üçün əlçatan olan modul onlara istənilən vaxt və istənilən sayda özlərini onlayn sınamaq imkanı verir.
Bu innovativ platforma ATU-nun rəqəmsal transformasiya və innovasiya strategiyası çərçivəsində təhsil prosesində müasir texnoloji həllərin tətbiqinə və imtahan sistemində rəqəmsallaşmaya keçidin təmin olunmasına xidmət edir.
Azərbaycan Texnologiya Universitetində (ATU) strukturun optimallaşdırılması və tədris prosesinin müasir ixtisasların tələblərinə uyğunlaşdırılması istiqamətində növbəti dəyişikliklər həyata keçirilib.
✅ Universitet Elmi Şurasının 26 may 2026-cı il tarixli qərarına əsasən Avtomatika, telekommunıkasiya və informatika fakültəsinin adı dəyişdirilərək Rəqəmsal texnologiyalar fakültəsi adlandırılıb.
Eyni zamanda fakültənin tərkibində fəaliyyət göstərən kafedraların strukturunda da yenilənmə aparılıb. Belə ki, mövcud dörd kafedra ləğv edilərək onların bazasında iki yeni kafedra yaradılıb.
✅ Avtomatika və informasiya texnologiyalari və Kompüter mühəndisliyi və telekommunikasiya kafedralarının əsasında İnformasiya texnologiyaları və təhlükəsizliyi kafedrası;
✅ Ümumi və tətbiqi fikizka və Ümumi və tətbiqi riyaziyyat kafedralarının əsasında isə Rəqəmsal sistemlər və dəqiq elmlər kafedrası yaradılıb.
Həyata keçirilən dəyişikliklər universitetin tədris istiqamətlərinin daha da optimallaşdırılması, rəqəmsal transformasiya proseslərinin gücləndirilməsi və ixtisasların əmək bazarının tələblərinə uyğunlaşdırılması məqsədi daşıyır.
Azərbaycan Texnologiya Universitetində (ATU) yaz semestri ərzində fəaliyyət göstərən “Conversation Club” layihəsi uğurla yekunlaşıb. Layihə çərçivəsində bir neçə ay davam edən kursda tələbələr ingilis dilində sərbəst danışıq bacarıqlarını inkişaf etdirib, müxtəlif mövzular üzrə interaktiv müzakirələrdə iştirak edib və real kommunikativ mühitdə təcrübə qazanıblar.
Təlimlər ATU-nun Xarici dillər kafedrasının peşəkar müəllimləri və əcnəbi müəllimlərin iştirakı ilə həyata keçirilib ki, bu da tələbələrə müxtəlif linqvistik mühitlərdən olan mütəxəssislərlə birbaşa ünsiyyət imkanı yaradaraq onların dil bacarıqlarının daha da inkişafına töhfə verib.
Layihənin yekununda fəal iştirak edən və təlimçi qismində çıxış edən əcnəbi tələbələr - Zeeshan Murtaza, İmran Abbas və Abdul Saboor təşəkkürnamə ilə təltif olunublar.
Qeyd edək ki, ATU-da “Conversation Club” artıq bir neçə ildir ənənəvi qaydada hər semestr təşkil olunur. Layihənin əsas məqsədi tələbələrin ingilis dili üzrə kommunikasiya bacarıqlarının gücləndirilməsi və onların real ünsiyyət mühitində daha sərbəst şəkildə özünü ifadə etməsinə dəstək verməkdir.
Azərbaycan Texnologiya Universiteti (ATU) tərəfindən Şuşa şəhərində Ümummilli Lider Heydər Əliyevin anadan olmasının 103 illiyinə, 28 May – Müstəqillik Gününə və 15 İyun – Milli Qurtuluş Gününə həsr olunmuş “İstiqlaldan Zəfərə” adlı tədbir təşkil olunub.
Tədbir Azərbaycan Respublikasının Dövlət Himninin səsləndirilməsi ilə başlayıb. Daha sonra Ümummilli Lider Heydər Əliyevin və Azərbaycanın ərazi bütövlüyü, azadlığı və müstəqilliyi uğrunda canından keçmiş şəhidlərin əziz xatirəsi bir dəqiqəlik sükutla yad edilib.
Tədbirdə çıxış edən ATU-nun rektoru Yaşar Ömərov bildirib ki, Azərbaycan dövlətçiliyinin qorunması, milli həmrəyliyin təmin olunması və müstəqil Azərbaycanın inkişaf strategiyasının formalaşdırılması Ümummilli Lider Heydər Əliyevin misilsiz xidmətləri nəticəsində mümkün olub. Rektor qeyd edib ki, bu gün Azərbaycanın əldə etdiyi Böyük Zəfərin təməlində də məhz Ulu Öndərin müəyyənləşdirdiyi siyasi kurs dayanır. Yaşar Ömərov tədbirin Şuşada keçirilməsinin xüsusi rəmzi məna daşıdığını vurğulayaraq bildirib ki, Azərbaycanın mədəniyyət paytaxtında istiqlal, milli qurtuluş və Zəfər ideyalarının bir arada qeyd olunması dövlətimizin gücünün, xalqımızın birliyinin və tarixi ədalətin təntənəsinin ifadəsidir.
Daha sonra elm və innovasiya məsələləri üzrə prorektor Sahil Həmidov, sosial məsələlər və ictimaiyyətlə əlaqələr üzrə prorektor Şahmar Həsənov, iqtisadi məsələlər üzrə müşavir İlham Vəliyev məruzələrlə çıxış ediblər.
Tədbirdə həmçinin İdarəetmə kafedrasının müdiri, professor Fizuli Məmmədov və Turizm fakültəsinin dekanı Yusif Hümbətov çıxış edərək Ümummilli Lider Heydər Əliyevin Azərbaycan dövlətçiliyinin qurulması və inkişafındakı tarixi xidmətlərindən, milli qurtuluş və müstəqillik tarixindən, eləcə də Azərbaycanın Böyük Zəfərə gedən yolundan danışıblar.
