Azərbaycan Texnologiya Universitetində (ATU) şəhid tələbə və məzunların xatirə guşəsinin açılışı olub.
Açılışdan əvvəl ATU-nun rektoru v.m.i.e. dos. Yaşar Ömərov şəhid ailələri ilə görüşüb, bildirib ki, universitet şəhid tələbə və məzunları ilə fəxr edir, onların xatirəsini daim əziz tutur.
Şəhid anaları çıxış edərək övladlarının tələbəlik illərini, müəllimlərini yada salıb, şəhid adlarının əbədiləşdirilməsi ilə bağlı universitet rəhbərliyinə təşəkkür ifadə ediblər.
Daha sonra universitetin II korpusunda yerləşən “ATU-nun şəhid tələbə və məzunları” guşəsinin açılışı olub.
Kompozisiyada xəritə, dəmir yumruq, xarı bülbül və universitetin 10 şəhid tələbə və məzununun şəkilləri və məlumatları yer alıb. Mərkəzdə təsvir edilən bütöv Azərbaycan xəritəsini 44 günlük Vətən müharibəsi şəhidlərinin şəkilləri təşkil edir ki, bu da torpaqlarımızın Vətən uğrunda canından keçən şəhidlərin sayəsində bütövləşdiyini tərənnüm edir.
Qeyd edək ki, şəhidlər guşəsi ATU-nun tərəfdaşlarından olan “Codelandia” şirkətinin dəstəyi ilə ərsəyə gəlib.
Azərbaycan Texnologiya Universitetində “Azərbaycan Universitetlərində Yaşıl və Dayanıqlı Qlobal İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması” (REFRESH) Erasmus+ KA2 layihəsi ilə bağlı məlumatlandırma günü keçirilib.
Tədbir Azərbaycan Texnologiya Universitetinin tərəfdaş olduğu, Avropa Birliyi tərəfindən maliyyələşdirilən, Azərbaycan Dövlət İqtisad Universitetinin koordinatorluğu ilə həyata keçirilən REFRESH layihəsinin İsveç səfərinə həsr edilib.
Görüşdə öncə layihə meneceri, tədris işləri üzrə prorektor Raqif Hüseynov REFRESH layihəsinin məqsədi, yerli və xarici tərəfdaşları, cari fəaliyyət planı barədə məlumat verib, daha sonra beynəlxalq ləyihələr üzrə mütəxəssis Ramidə Xəlilova cari ilin 10-14 iyun tarixlərində KTH Kral Texnologiya İnstitutunda baş tutan səfərin nəticələrini təqdim edib, əldə olunan təcrübələri bölüşüb, bərpa olunan enerji, virtual laboratoriyanın qurulması və onunla bağlı təşkil ediləcək təlimlər barədə ətraflı məlumat verib.
Sonda tədbir iştirakçılarını maraqlandıran suallar cavablandırılıb.
Azərbaycan Texnologiya Universitetində (ATU) 27 Sentyabr - Anım Gününə həsr edilmiş tədbir keçirilib. Tədbirdə Vətən Müharibəsi şəhidlərinin ailə üzvləri və qazilər iştirak edib.
Tədbirdən öncə universitetin həyətində ATU-nun şəhid məzun və tələbələrinin xatirəsinə ucaldılmış abidə ziyarət edilib, önünə gül dəstələri düzülüb.
Tədbir Azərbaycan Respublikasının Dövlət Himninin səsləndirilməsi və Vətənin ərazi bütövlüyü uğrunda canından keçən şəhidlərimizin əziz xatirəsinin bir dəqiqəlik sükutla yad edilməsi ilə açıq elan edilib.
Sonra fəxri qonaqlar və ATU kollektivi üçün “44 Gün, 44 An” adlı sənədli film nümayiş etdirilib. 40 dəqiqə davam edən film zalda duyğulu anlar yaşadıb.
Daha sonra ATU-nun prorektoru Şahmar Həsənov, universitetin şəhid məzunu Elməddin Nəsibovun atası Süleyman Nəsibov, müəllimi İsa Əhmədov, qazi magistr Gündüz Abdullayev çıxış edərək Ali Baş Komandan İlham Əliyevin rəhbərliyi ilə rəşadətli Azərbaycan Ordusunun qüdrətindən, mübariz əsgər və zabitlərdən, şəhid və qazilərin misilsiz qəhrəmanlıqlarından, o cümlədən ATU-nun Vətən Müharibəsinə qoşulan şəhid məzun və tələbələrindən danışıblar.
Sonda tələbə Turanə Bədəlovanın ifasında "Salam şəhid anası" adlı şeir səsləndirilib.
Azərbaycan Texnologiya Universiteti (ATU) Erasmus+ proqramı çərçivəsində Avropa universitetləri ilə əməkdaşlığı uğurla davam etdirir.
2023/2024-cü tədris ilində Azərbaycan Texnologiya Universitetinin daha 8 tələbəsi Avropa Komissiyasının Erasmus+ proqramından yararlanıb.
Belə ki, müvafiq tədris ili ərzində universitetin 7 tələbəsi Qranada Universiteti (İspaniya), Xaen Universiteti (İspaniya), Varşava Ekologiya və Menecment Universiteti (Polşa) və İaşi Texniki Universitetində (Rumıniya) təhsilini uğurla bitirib, daha bir tələbə isə növbəti semestrdə İaşi Texniki Universitetində (Rumıniya) təhsil almaq hüququ əldə edib.
Universitetin rektoru v.m.i.e dos. Yaşar Ömərov 23.09.2024-cü il tarixində həmin tələbələrlə görüşərək onları bu uğurları münasibətilə təbrik edib, öz tövsiyələrini verib. Tələbələrin mübadilə ilə bağlı təəssüratlarını dinləyən Y.Ömərov onlara gələcək təhsillərində müvəffəqiyyətlər arzulayıb, bu kimi proqramlarda iştirakın əhəmiyyətindən danışaraq beynəlxalq mübadilə proqramlarının gənclərin elmə, müasir texnologiyalara və qabaqcıl biliklərə yiyələnməsində vacib rol oynadığını və əldə edilən bilik və bacarıqların ölkəmizin inkişafı üçün zəruri olduğunu vurğulayıb.
Tələbələr də öz növbəsində onlar üçün belə imkanlar yaradıldığına görə minnətdarlıq ifadə edib, bu kimi təcrübələrin gələcəkdə peşəkar fəaliyyətlərinə böyük töhfə verəcəyini bildiriblər.
Qeyd edək ki, Azərbaycan Texnologiya Universiteti hazırda Erasmus+ mübadilə proqramı çərçivəsində Avropa ölkələrinin çoxsaylı universitetləri ilə sıx əməkdaşlıq edir və proqram çərçivəsində təhsil alan tələbələrin bütün xərcləri Erasmus+ proqramı çərçivəsində Avropa Birliyi tərəfindən qarşılanır.
