ATU-Azərbaycan Texnologiya Universiteti

Xəbərlər

Universitetimizdə ən son xəbərləri buradan əldə edin.

2024-04-03

BP layihəsinə dair məlumatlandırma günü keçirilib

BP şirkətinin Azərbaycan Texnologiya Universitetində həyata keçirdiyi “Kibertəhlükəsizlik üzrə elmi, metodiki, tədqiqat və təlim mərkəzinin (layihəsinin) təşkili” layihəsinə dair məlumatlandırma günü keçirilib.

Tədbirdə Avtomatika telekommunikasiya və informatika fakültəsinin dekanı Rövşən Hacıyev layihənin əsas məqsədi, kibertəhlükəsizlik mərkəzinin gələcək fəaliyyəti barədə geniş məlumat verib.

Qeyd edək ki, mərkəz ATU tələbələrinə kriptoqrafiya və kriptologiya üzrə xüsusi hazırlanmış kurikuluma əsasən təlimlərin verilməsini, Gəncə və ətraf ərazilərdə fəaliyyət göstərən dövlət və biznes müəsissələri üçün kibertəhlükəsizlik sahəsi üzrə qabaqcıl biliyə malik kadrların hazırlanmasını və həmçinin İKT sahəsində vətəndaş cəmiyyəti, biznes və dövlət orqanları nümayəndələrinə təlimlərin həyata keçirilməsini nəzərdə tutur.

2024-04-03

ATU-da elmi-praktik seminar keçirilib

Azərbaycan Texnologiya Universitetinin (ATU) İqtisadiyyat və İdarəetmə fakültəsində “Yaşıl dünya naminə həmrəylik ili” çərçivəsində "Davamlı ekoloji inkişaf: innovativ texnologiyalar" mövzusunda elmi-praktik seminar keçirilib.

ATU Tələbə Elmi Cəmiyyətinin (TEC) təşkilatçılığı ilə baş tutan seminarda strateji inkişaf və rəqəmsallaşma məsələləri üzrə rektor müşaviri Mehman Kərimov, İdarəetmə kafedrasının müdiri prof. Füzuli Məmmədov, Turizm sənayesinin təşkili kafedrasının müdiri Yusif Hümbətov, İqtisadiyyat kafedrasının müdiri Mamed Urkayev, TEC sədri Aysel Məmmədli, professor-müəllim heyəti və tələbələr iştirak edib.

Tədbirdə M. Kərimov, F. Məmmədov, Y. Hümbətov və M. Urkayev çıxış edərək mövzuların aktuallığına diqqət çəkib, məruzəçi tələbələrə uğurlar arzulayıblar.

Seminarda İdarəetmə, İqtisadiyyat, eləcə də Turizm sənayesinin təşkili kafedralarının bakalavr və magistrlarının təqdimatında “Qarabağda ağıllı kənd sistemi”, “Yaşıl marketinqdə innovativ alətlər”, “Filtrilizasiya dronları, Qlobal iqlim dəyişikliyinin dünya iqtisadiyyatına təsiri”, “İşğaldan azad olunmuş ərazilərdə yaşıl iqtisadiyyatın inkişaf potensialı”, “Regionlarda ekoturizm sektorunun inkişafı və məhdudiyyətlərin aradan qaldırılması”, “Ağıllı şəhərlər: davamlılıq üçün texnologiyalar və tətbiqlər” başlıqlı məruzələr dinlənilib, gənc tədqiqatçılara suallar verilib, mövzular ətrafında geniş fikir mübadiləsi aparılıb.

2024-04-02

Aprel döyüşlərindən 8 il ötür

Şanlı Zəfərin başlanğıcı olan Aprel döyüşlərindən 8 il ötür.

Azərbaycan Texnologiya Universitetinin məzunu olan şəhid Rəşad Niftalılının timsalında bütün Aprel şəhidlərini qürurla yad edirik.

Allah rəhmət eləsin.

2024-04-02

(REFRESH) Erasmus+ KA2 layihəsinin rəsmi veb-saytı istifadəyə verilib

Avropa Birliyi tərəfindən maliyyələşdirilən, Azərbaycan Dövlət İqtisad Universitetinin (UNEC) koordinatorluğu ilə həyata keçirilən və Azərbaycan Texnologiya Universitetinin tərəfdaş olduğu “Azərbaycan Universitetlərində Yaşıl və Dayanıqlı Qlobal İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması” (REFRESH) Erasmus+ KA2 layihəsinin rəsmi veb-saytı istifadəyə verilib.

Saytda layihə haqqında ümumi məlumat, layihənin məqsəd və vəzifələri, iş paketləri, tərəfdaşların təsviri, xəbərlər, şəkillər və ictimaiyyətə açıq sənədlər bölməsi əks olunub.

Veb-saytın linki:

www.refresh-erasmus.com

2024-04-02

ATU-da Aprel döyüşlərinə həsr edilmiş tədbir keçirilib

Azərbaycan Texnologiya Universiteti və Vətən Müharibəsi Əlillərinə Kömək İctimai Birliyinin birgə təşkilatçılığı ilə Aprel döyüşlərinə həsr edilmiş tədbir keçirilib.

Əvvəlcə Dövlət Himni səsləndirilib, daha sonra Aprel şəhidlərinin timsalında Vətən uğrunda canından keçən Vətən övladlarının əziz xatirəsi bir dəqiqəlik sükutla yad edilib.

Tədbirdə Azərbaycan Texnologiya Universitetinin sosial məsələlər və ictimaiyyətlə əlaqələr üzrə prorektoru Şahmar Həsənov, şəhid ailələri, qazilər, professor-müəllim heyəti və tələbələr iştirak edib.

Prorektor Ş.Həsənov giriş sözü ilə çıxış edərək Müzəffər Ali Baş Komandan İlham Əliyevin rəhbərliyi ilə rəşadətli ordumuzun Aprel döyüşləri və Vətən müharibəsi zamanı həyata keçirdiyi əks-hücum əməliyyatlarının nəticələrindən danışıb, Azərbaycan bayrağının azad olunmuş Lələtəpə yüksəkliyində və Qarabağ torpaqlarında ucaldılmasının, Zəfərin xalqımıza və türk dünyasına böyük qürur və sevinc hissləri yaşatdığını vurğulayıb.

Tədbirdə şəhid ailələri və qazilərin çıxışları, xatirələri dinlənilib. Şəhidlərin döyüş meydanında göstərdikləri qəhrəmanlıqlardan, onların keçdiyi şərəfli yoldan bəhs edilib.

Tədbir çərçivəsində Aprel döyüşlərinə həsr edilmiş videoçarx izlənilib, fəallığı ilə seçilən bir qrup tələbələr təltif edilib.

2024-03-29

“Ləmbəli Oğuz Türk yurdu: dili və xalçalarındakı tarix” adlı monoqrafiya nəşr olunub

Azərbaycan Texnologiya Universitetinin Yüngül sənaye mühəndisliyi və dizayn kafedrasının professoru Cahangir Hacıyevin “Ləmbəli Oğuz Türk yurdu: dili və xalçalarındakı tarix” adlı monoqrafiyası nəşr olunub.

Monoqrafiyada türklərin böyük yayılma köçü və daxili yerdəyişmələri, köçün səbəbləri və yayılma coğrafiyası, o cümlədən Bozqurdlar, Oğuz türkləri və Pazırıq xalısındakı kodlaşdırılmış informasiyalar haqqında bilgilər yer alır.

Nəşrdə Lənbəli kəndində formalaşmış danışıq dili və Lənbəli xalçaları elmi-tədqiqat obyekti kimi götürülərək hər iki istiqamətdə mövcud materiallar üzərində araşdırmalar aparılıb, xalçaların naxış, süjet və kompozisiyalarının əsrlərlə sirr olaraq saxladığı tarixi faktlar üzə çıxarılıb.

Kitab filologiya, tarix, xalçaçılıq və dizaynla məşğul olan mütəxəssislər, ali məktəblərin müvafiq ixtisaslarında təhsil alanlar və müəllimlər üçün nəzərdə tutulub.