Azərbaycan Texnologiya Universitetinin rektor əvəzi dosent Yaşar Ömərov mübadilə proqramı çərçivəsində xaricə gedən tələbələrlə görüşüb.

Y.Ömərov tələbələri uğurları münasibəti ilə təbrik edərək müvəffəqiyyətlər arzulayıb, ölkəmizi və universitetimizi layiqincə təmsil edərək bilik və bacarıqlarını artırmağı tövsiyə edib. Bildirib ki, xaricdə təhsil alan gənclərimiz ölkəmiz üçün faydalı olmalı, onlar üçün yaradılan şəraiti lazımınca dəyərləndirməlidirlər.

Görüşdə iştirak edən tələbələr Erasmus+ mübadilə programı çərçivəsində 2023/2024-cü tədris ili üçün 1 semestr müddətində Avropa ölkələrində təhsil alacaqlar. Belə ki, kompyuter mühəndisliyi ixtisasının 2-ci kurs magistrantları Sahib Əlihüseynov və Bəsti Cəfərova İspaniyanın Caen (Jaen) Universitetində, dizayn ixtisasının 2-ci kurs tələbələri Həsənzadə Murad Rumıniyanın İaşi Texniki Universitetində, Günel Hacıyeva isə Polşanın Varşava Ekologiya və Menecment Universitetində təhsillərini davam etdirəcəklər.

Azərbaycan Texnologiya Universitetinin Tədris şöbəsinin müdiri vəzifəsinə dosent Cəsarət Şabanov təyin edilib.

Cəsarət Əliheydər oğlu Şabanov 6 mart 1965-ci ildə Lənkəranda anadan olub.

Azərbaycan Dövlət Aqrar Universitetinin aqrokimya və torpaqşünaslıq ixtisasını 1993-cü ildə fərqlənmə ilə bitirib.

AMEA-nın Torpaqşünaslıq və Aqrokimya İnstitutunda aspirantura təhsili aldıqdan sonra, 2001-ci ildə fəlsəfə doktoru elmi dərəcəsinə layiq görülüb.

Müxtəlif illərdə AMEA-nın Torpaqşünaslıq və Aqrokimya İnstitutunda elmi işçi, Dövlət Yerquruluşu Layihə İnstitutunda torpaqşünas-mühəndis, Bakı Dövlət Universitetində (BDU) laboratoriya müdiri, baş müəllim, dosent vəzifələrində çalışıb, bunadək isə BDU-nun Ekologiya və torpaqşünaslıq fakültəsinin dekan müavini işləyib.

Azərbaycan Texnologiya Universitetinin rektoru v.m.i.e. dos. Yaşar Ömərov 2023/2024-cü tədris ilinə hazırlıqla bağlı iclas keçirib. İclasda rəhbər heyət, dekanlar, kafedra müdirləri, mərkəz və şöbə müdirləri iştirak edib.

Y.Ömərov iclas iştirakçılarını yeni tədris ilinin başlanması ilə əlaqədar təbrik edib, bakalavr və magistr qəbulunun nəticələri barədə qısa məlumat verib.

İclas zamanı dərs yüklərinin və dərs cədvəllərinin vaxtında hazırlanması, vaxtında təqdim olunması və yeni dərs ilində qarşıda duran digər məsələlərin icrası ilə bağlı tapşırıqlar verilib.

İclas çərçivəsində yeni təyinatlar - Tədris şöbəsinin müdiri dosent Cəsarət Şabanov və İnsan resursları şöbəsinin müdiri İlham Əlizadə kollektivə təqdim edilib.

"Abituriyentlərə Dəstək Mərkəzi"miz hər gün saat 11:00-dan yenidən abituriyentlərin ixtiyarındadır.

Elektron qeydiyyatla bağlı çətinliklə qarşılaşanlar universitetimizdə fəaliyyət göstərən "Abituriyentlərə Dəstək Mərkəzi"nin təmənnasız xidmətindən yararlana bilərlər.

Qeydiyyat üçün müraciət edənlər özləri ilə aşağıdakı sənədləri gətirməlidirlər:
1. Şəxsiyyət vəsiqəsinin surəti
2. Attestat (diplom, arayış)
3. Şəkil (3x4 ölçüdə, tələbə bileti üçün)
4. Hərbi qeydiyyat vəsiqəsi (ağ bilet) və ya hərbi biletin surəti
5. Təhsil haqqının ödənilməsinə dair qəbz (Kapital Bank)
6. Təhsil haqqını ödəməkdən azad olanlar üçün statusu təsdiq edən sənədin notarial qaydada təsdiq olunmuş surəti

Xatırladaq ki, ali təhsil müəssisələrinə qəbul olan abituriyentlərin qeydiyyatı elektron qaydada portal.edu.az vasitəsilə aparılır. Qeydiyyat prosesi 14 sentyabr saat 18:00-dək davam edəcək.

Azərbaycan Texnologiya Universitetinin İnsan resursları şöbəsinin müdiri vəzifəsinə İlham Əlizadə təyin edilib.

İlham Hacıbaba oğlu Əlizadə 30 may 1958-ci ildə Gəncə şəhərində anadan olub. 1980-ci ildə Gəncə Dövlət Universitetini (GDU) tarix ixtisası üzrə bitirib. 1998-ci ildə Bakı Dövlət Universitetində (BDU) hüquqşünaslıq ixtisası üzrə ikinci təhsilini başa vurub.

Əmək fəaliyyətinə 1984-cü ildən başlayıb. Dövlət qurumlarında və sənaye müəssisələrində çalışıb. Gəncə şəhər İcra Hakimiyyəti Aparatında müxtəlif vəzifələrdə (mütəxəssis, baş məsləhətçi, şöbə müdiri, İcra Hakimiyyəti Başçısının birinci müavini), Gəncə şəhər Kəpəz və Nizami bələdiyyələrində isə hüquq şöbəsinin müdiri vəzifəsində çalışıb.

Həmçinin, BP Azərbaycan şirkətinin məsul şəxsi, Cənubi Qafqaz Boru Kəmərinin Genişləndirilməsi Layihəsində baş koordinatoru, indiyədək isə “Simurq Kompani” Səhmdar Cəmiyyətində hüquq və insan resursları şöbəsinin müdiri olub.

2022-ci ildə tarix üzrə fəlsəfə doktoru elmi dərəcəsinə layiq görülüb.

Elm və Təhsil Nazirliyinin Təhsilin İnkişafı Fondu və İqtisadiyyat Nazirliyinin Dördüncü Sənaye İnqilabının Təhlili və Koordinasiya Mərkəzi ABŞ-nın “Coursera” şirkətilə əməkdaşlıq çərçivəsində "4Sİ Akademiyası" layihəsinə başlayıb.

Layihənin məqsədi ölkədə Dördüncü Sənaye inqilabı texnologiyaları sahəsində bilik və bacarıqların inkişaf etdirilməsi, əmək bazarında bu sahə üzrə ixtisaslı kadrların hazırlanmasına dəstək olmaqdır.

Layihə çərçivəsində 4Sİ texnologiyaları, süni intellekt, data analitikası, blokçeyn və bulud texnologiyaları, proqramlaşdırma dilləri, liderlik, kommunikasiya bacarıqları daxil olmaqla ümumilikdə 800-ə yaxın kursdan yararlanmaq mümkün olacaq.

Layihə üçün qeydiyyat 7 sentyabr tarixinədək aparılır. Həmin tarixədək qeydiyyatdan keçən ilk 10 minə yaxın şəxs 700-dən çox ödənişsiz təlimə qoşula biləcək.

Qeydiyyat linki : https://4sim.gov.az/en/applicationForm