Azərbaycan Texnologiya Universitetində (ATU) Elmi Şuranın növbəti iclası keçirilib. Universitetin rektoru, elmi şura sədri Yaşar Ömərov yetərsayı nəzərə alaraq iclası açıq elan edib, gündəlikdə duran məsələləri diqqətə çatdırıb.
İclasda Tədrisin təşkili və idarə olunması şöbəsinin müdiri Cəsarət Şabanovun yaz imtahan sessiyasına hazırlığın vəziyyətinə dair hesabatı dinlənilib. Ardınca İctimai elmlər və multikulturalizm kafedrasının müdiri Fuad Yusifovun, Beynəlxalq əməkdaşlıq şöbəsinin müdiri Ülviyyə Məmmədovanın, eləcə də Mühasibat uçotu və iqtisadi təhlil şöbəsinin müdiri İradə Zeynalabdinzadənin hesabatı dinlənilib. Daha sonra strateji inkişaf və rəqəmsallaşma məsələləri üzrə müşavir Mehman Kərimov Dayanıqlılıq komissiyasının yaradılması barədə təkliflə çıxış edib.
İclasda Maşın mühəndisliyi və logistika kafedrasının əməkdaşı Rəsmiyyə Rzayevanın dosent elmi adı alması üçün Azərbaycan Respublikasının Prezidenti yanında Ali Attestasiya Komissiyası (AAK) qarşısında vəsatət qaldırılması ilə bağlı seçki keçirilib.
İclas çərçivəsində Avtomatika, telekommunikasiya və informatika fakültəsinin dekanı, Avtomatika və informasiya texnologiyaları kafedrasının dosenti Rövşən Mustafa oğlu Hacıyev AAK-ın 11.04.2025-ci il tarixli qərarı ilə 3102.01 – Aqromühəndislik ixtisasında texnika elmləri elm sahəsi üzrə elmlər doktoru dərəcəsi alması münasibəti ilə təltif edilib.
Azərbaycan Texnologiya Universitetinin akademik heyəti və gənc tədqiqatçıları üçün “Web of Science” platformasına dair seminar təşkil olunub. Elm və Ali Təhsil üzrə Dövlət Agentliyinin təşkilatçılığı ilə baş tutan seminar "Elmi informasiya resurslarına çıxış və tədqiqat dəstəyi" mövzusuna həsr edilib.
Tədbirdə giriş sözü ilə ATU-nun elm və innovasiyalar üzrə prorektoru v.m.i.e., elm və xarici əlaqələr üzrə müşaviri Sahil Həmidov çıxış edib, keçilən mövzuların aktuallığını vurğulayaraq Agentliyin tədqiqatçılar üçün təşkil etdiyi silsilə tədbirlərin elmi potensialın artırılmasında və yeni imkanların tanıdılmasında mühüm rol oynadığını bildirib.
Seminarı Clarivate şirkətinin Azərbaycan üzrə məsul əməkdaşı İltifat İbrahimov təqdim edib, iştirakçılara “Web of Science” platforması, “Web of Science Research Assistant” Suni İntellekt aləti, “Journal Citation Reports”, təşkilat və tədqiqatçı profilləri, həmçinin “EndNote” referans idarəetmə sistemi barədə geniş məlumat verərək mövzu ətrafında ünvanlanan sualları cavablandırıb.
Azərbaycan Texnologiya Universitetinin (ATU) 55 illik yubileyi çərçivəsində Azərbaycan Texnologiya Universitetinin təşkilatçılığı, Azərbaycan Respublikasının Gənclər Fondu, İnnovasiya və Rəqəmsal İnkişaf Agentliyinin dəstəyi ilə ölkənin ən iri startap yarışlarından biri olan -"GreenTech II" Startap və yaşıl texnologiyalar müsabiqəsinin final mərhələsi keçirilib.
Tədbirin rəsmi açılış hissəsində Azərbaycan Texnologiya Universitetinin rektoru Yaşar Ömərov, Azərbaycan Respublikasının Gənclər Fondunun icraçı direktoru vəzifəsini icra edən Qədir Xəlilov və Milli Məclisin deputatı Pərvin Kərimzadə çıxış edərək vurğulayıblar ki, müsabiqə gənclərdə ekoloji düşüncə tərzinin formalaşmasına və ekoloji məsuliyyət hissinin artırılmasına, gənclərin startap ekosistemi ilə daha yaxından tanış olmalarına, öz biznes ideyalarını ortaya çıxarmalarına və gələcəyin sahibkarları kimi yetişmələrinə müsbət təsir göstərir. Həmçinin qeyd olunub ki, bu kimi təşəbbüslər gənclərə nəzəri biliklərini praktikaya çevirmək üçün imkan yaradır və komanda şəklində işləmək bacarıqlarını aşılayır.
Müsabiqədə respublikanın 30 ali təhsil müəssisəsindən 80 komanda “Rəqəmsal ekologiya”, “Robototexnika”, “Yaşıl nəqliyyat texnologiyaları” və “Davamlı inkişaf üçün sosial innovasiyalar” olmaqla 4 kateqoriya üzrə I, II, III və həvəsləndirici yerlər uğrunda mübarizə aparıb.
Yarışın kubokunu kateqoriyalar üzrə müvafiq olaraq Bakı Dövlət Universitetinin “Smart hidro camp”, Qarabağ Universitetinin “Sky Bi”, Milli Aviasiya Akademiyasının “Smart X”, Bakı Ali Neft Məktəbinin “Meta Yeast” komandası əldə edib.
II yerin qalibləri ADA Universitetinin “Lubre en”, Memarlıq və İnşaat Universitetinin “Robo bin”, Azərbaycan Texniki Universitetinin “City Mobility”, Milli Aviasiya Akademiyasının “Drone Flux” komandaları olub.
III yerə Xəzər Universitetinin “Uvita”, Qərbi Kaspi Universitetinin “Doma Tech”, Bakı Ali Neft Məktəbinin “BHOSs”, Bakı Dövlət Universitetinin “Tech Titans” komandaları layiq görülüb.
Həvəsləndirici yerlərdə isə Mingəçevir Dövlət Universitetinin “GreenS park/Flame Guard”, Naxçıvan Dövlət Universitetinin “Energella”, Gəncə Dövlət Universitetinin “Liquid3”, Azərbaycan Dövlət Aqrar Universitetinin “Təbii fəlakət yardımı” komandaları qərarlaşıb.
Qalib komandalar sertifikat və hədiyyələrlə təltif olunublar.
Qeyd edək ki, müsabiqə "Coca-Cola", "Lenovo", Səhliyalı, "Baku Electronics", "AZGRANATA" və "ATS Food"un sponsorluğu ilə təşkil edilib.
Azərbaycan Texnologiya Universitetində (ATU) BP şirkətinin Azərbaycandakı nümayəndəliyinin dəstəyi ilə yaradılmış Kibertəhlükəsizlik Mərkəzinin rəsmi açılış mərasimi keçirilib.
Tədbirdə ATU-nun rektoru Yaşar Ömərov, BP Azərbaycanın Xəzər regionunda kommunikasiya və xarici əlaqələr üzrə vitse-prezidenti Bəxtiyar Aslanbəyli, BP-nin tərəfdaş şirkətlərinin nümyəndələri və ATU-nun professor-müəllim heyəti iştirak edib.
Açılış tədbiri çərçivəsində əvvəlcə ATU ilə BP Azərbaycan arasında görüş keçirilib, əməkdaşlıq məsələləri müzakirə edilib.
Daha sonra qonaqlar açılış lentini kəsərək regionun ilk Kibertəhlükəsizlik Mərkəzində yaradılan şəraitlə tanış olublar.
Rektor Yaşar Ömərov BP ilə qurulan əməkdaşlığı yüksək qiymətləndirərək bildirib ki, regionda ilk olan bu mərkəzin yaradılması universitetin elm və tədris imkanlarının genişlənməsinə, eyni zamanda informasiya təhlükəsizliyi sahəsində kadr potensialının güclənməsinə mühüm töhfə verəcək.
Bəxtiyar Aslanbəyli isə çıxışında Kibertəhlükəsizlik Mərkəzinin əhəmiyyətini vurğulayaraq BP-nin ölkədə təhsil sahəsində həyata keçirdiyi layihələrdən danışıb.
Açılış tədbirində tərəfdaş şirkətlərin nümayəndələri və universitetin professor-müəllim heyəti də çıxış edərək mərkəzin fəaliyyətinə uğurlar arzu ediblər.
Məlumat üçün bildirək ki, 1 ixtisaslaşmış laboratoriya və heyət üçün 1 köməkçi otaqdan ibarət Kibertəhlükəsizlik Mərkəzi Avtomatika, telekommunikasiya və informatika fakültəsinin nəzdində fəaliyyət göstərəcək. Layihənin əsas məqsədi ATU tələbələrinin kriptoqrafiya və kriptologiya sahəsində qabaqcıl biliklərə yiyələnməsini təmin etmək, kibertəhlükəsizlik üzrə xüsusi kurikulum əsasında təlimlər təşkil etmək və Gəncə regionunda fəaliyyət göstərən dövlət, özəl və vətəndaş cəmiyyəti nümayəndələrinin rəqəmsal savadlılıq səviyyəsini artırmaqdır.
Yeni mərkəzdə nəzəri və praktiki təlimlərlə yanaşı, tədqiqat işləri də aparılacaq, mütəxəssislər və tələbələr real kiberhücum ssenariləri üzərində işləyərək peşəkar bacarıqlarını inkişaf etdirəcəklər.
Azərbaycan Texnologiya Universitetində (ATU) Elm və Ali Təhsil üzrə Dövlət Agentliyi (EATDA) tərəfindən Gəncə və ətraf rayonların elm və ali təhsil ictimaiyyətinə açıq info-sessiya keçirilib.
Tədbirdə giriş sözü ilə ATU-nun elm və innovasiyalar üzrə prorektoru v.m.i.e., elm və xarici əlaqələr üzrə müşaviri Sahil Həmidov çıxış edərək info-sessiyanın əsas məqsədinin süni intellekt alətlərindən istifadə etməklə elmi tədqiqatların keyfiyyətinin artırılması və bu prosesin daha səmərəli təşkili yollarının təqdim edilməsi olduğunu bildirib, bu kimi tədbirlərin elmi potensialın artırılmasında və yeni imkanların tanıdılmasında mühüm rol oynadığını vurğulayıb.
Daha sonra info-sessiyanı EATDA-nın Elmi müəssisələrlə iş şöbəsinin əməkdaşı Nərminə Abdullayeva davam etdirərək “Scopus” elmmetrik bazasından səmərəli istifadə və “Scopus AI” süni intellekt alətinin imkanları barədə təqdimatla çıxış edib. Təqdimatda “Scopus” elmmetrik bazasında əhatəli ədəbiyyat və etibarlı jurnal axtarışı strategiyaları, tədqiqat trendlərinin, istinadların və tədqiqat təsirlərinin təhlili, “Scopus”un süni intellekt alətindən səmərəli istifadə etməklə tədqiqata ayrılan vaxta qənaət və s. kimi mövzular əhatə olunub.
Təqdimatın sonunda iştirakçıların sualları cavablandırılıb.
