Azərbaycan Texnologiya Universitetinin (ATU) Avtomatika və informasiya texnologiyaları kafedrasının əməkdaşları İnnovasiya və Rəqəmsal İnkişaf Agentliyinin dəstəyi ilə təşkil olunan “Cisco Networking Academy” və “IBM SkillsBuild” platformaları üzrə beynəlxalq təlimləri uğurla tamamlayıblar.

Kafedranın 13 nəfər olmaqla bütün müəllim əməkdaşları “Kibertəhlükəsizlik” və “Süni İntellektin Əsasları (AI Fundamentals)” mövzularında keçirilən təlimlərdə iştirak edərək “Cisco” və “IBM”-in beynəlxalq səviyyədə tanınan sertifikatı ilə təltif olunublar. 

Proqram çərçivəsində iştirakçılar süni intellektin əsas konsepsiyaları — təbii dilin emalı (Natural Language Processing, NLP), kompüter görməsi (Computer Vision), maşın öyrənməsi (Machine Learning), dərin öyrənmə (Deep Learning), neyron şəbəkələr (Neural Networks) və çatbot texnologiyaları sahəsində nəzəri və praktiki biliklər əldə ediblər. Eyni zamanda, süni intellekt sistemlərinin etik aspektləri — ədalətlilik, şəffaflıq, məxfilik və izahlılıq (explainability) prinsipləri üzrə bacarıqlar formalaşdırılıb.

Təlimin sonunda iştirakçılar  “IBM Watson Studio” mühitində maşın öyrənməsi layihələri qurmaq və süni intellekt tətbiqlərinin müxtəlif peşə sahələrində istifadəsini izah etmək kimi praktiki tapşırıqları uğurla yerinə yetiriblər.

Azərbaycan Texnologiya Universitetində (ATU) Tələbə Gənclər Təşkilatının təşkilatçılığı ilə Mentor Klubunun növbəti inkişafyönümlü təlim sessiyası reallaşdırılıb.

Təlim Səkinə Xanbutayeva tərəfindən aparılıb. ATU-nun Avtomatika Telekommunikasiya və İnformatika fakültəsinin tələbəsi olan mentor şəxsi inkişaf və psixoloji bacarıqlar istiqamətində əldə etdiyi bilikləri iştirakçılarla bölüşüb, mövzuya fərqli yanaşmalar təqdim edib.

“Emosional zəka” mövzusuna həsr olunan təlimdə duyğuların idarə olunması, empati qurma bacarığı və sosial münasibətlərdə düzgün davranış modelləri barədə məlumat verilib. İştirakçılar emosional zəkanın həm gündəlik həyatda, həm də gələcək karyerada əhəmiyyəti ilə bağlı praktiki nümunələr əsasında maarifləndirilib.

Təlim dinamik müzakirələr və interaktiv tapşırıqlarla müşayiət olunub, tələbələr öz emosional reaksiyalarını daha yaxşı anlamaq və idarə etmək üçün faydalı biliklər əldə ediblər.

Azərbaycan Texnologiya Universiteti (ATU) ilə Gəncə Memorial Hospital arasında əməkdaşlıq əlaqələri qurulub. Bu əməkdaşlıq çərçivəsində universitetin professor-müəllim heyəti, digər əməkdaşları və tələbələri üçün klinikada endirimli qiymətlərlə tibbi müayinə və xidmətlərdən yararlanmaq imkanı yaradılıb.

Tərəflər arasında bağlanmış müqaviləyə əsasən, Gəncə Memorial Hospitalı ATU əməkdaşlarına geniş spektrdə – laborator analizlər üçün 25%, rentgen və ultrasəs müayinələri, terapevtik və ixtisaslaşmış tibbi xidmətlər üzrə isə 20% güzəştlər təqdim edəcək.

Əməkdaşlığın məqsədi universitet kollektiv və tələbələri üçün sağlamlıq imkanlarının əlçatanlığını artırmaq, profilaktik müayinələrin səmərəliliyini təmin etmək və sağlam həyat tərzinin təşviqinə töhfə verməkdir.

Azərbaycan Texnologiya Universiteti (ATU) ilə Qazaxıstanın Atırau Universiteti arasında əməkdaşlıq memorandumu imzalanıb.

Sənəd Azərbaycan Texnologiya Universitetinin rektoru Yaşar Ömərov və Qazaxıstanın Atırau Universitetinin rektoru Salamat İdrissov tərəfindən Qazaxıstanın Atırau şəhərində baş tutan Xəzəryanı universitetlərin Baş Assambleyası çərçivəsində imzalanıb. 

Memorandum hər iki ali təhsil müəssisəsi arasında elmi və akademik əlaqələrin genişləndirilməsini, birgə tədqiqat layihələrinin həyata keçirilməsini, tələbə və müəllim mübadiləsini, ortaq təlim proqramlarının hazırlanmasını, innovasiya və texnologiya sahəsində əməkdaşlığın qurulmasını nəzərdə tutur.

Bu fəaliyyət SDG 17 (Məqsədlər üçün tərəfdaşlıqlar), SDG 4 (Keyfiyyətli təhsil) və SDG 9 (Sənaye, innovasiya və infrastruktur) ilə sıx bağlıdır. Memorandumun birgə tədqiqat, mübadilə və ortaq proqramları əhatə etməsi universitetlərarası əlaqələrin strateji xarakterini göstərir. Belə beynəlxalq əməkdaşlıqlar bilik transferini və institusional inkişafı gücləndirir. Bu isə ali təhsilin qlobal inteqrasiyasına və innovasiya mühitinin genişlənməsinə töhfə verir.

Azərbaycan Texnologiya Universitetində (ATU) 18 Oktyabr Müstəqilliyin Bərpası Gününə həsr edilmiş tədbir keçirilib. Tədbirdə əvvəlcə Azərbaycan Respublikasının Dövlət Himni səsləndirilib, ardınca Ulu Öndər Heydər Əliyevin və Azərbaycanın ərazi bütövlüyü uğrunda canından keçmiş şəhidlərin əziz xatirəsi bir dəqiqəlik sükutla yad edilib.

Daha sonra sosial məsələlər və ictimaiyyətlə əlaqələr üzrə prorektor Şahmar Həsənov giriş sözü ilə çıxış edərək müstəqilliyin bərpası tarixinə nəzər salıb və bildirib ki, 18 Oktyabr Azərbaycan xalqının tarixində milli qürurun və dövlətçilik iradəsinin təntənəsi günüdür.
 
Tədbirdə ictimai elmlər və multikulturalizm kafedrasının əməkdaşları Mehriban Tağıyeva “Azərbaycan dövlətçiliyində müstəqillik tarixi”, Zəminə Novruzova “Müstəqilliyin bərpası: Azərbaycanın yeni dövrü”, Rafiq Hüseynov “Azərbaycan Respublikasının dövlət müstəqilliyinin bərpa edilməsi tarixi nailiyyətdir” başlıqlı məruzələrlə çıxış ediblər. Vurğulanıb ki, müstəqilliyin bərpası dövründə Ulu Öndər Heydər Əliyev ölkənin sabitliyinin və dövlətçiliyin qorunmasında həlledici rol oynayıb, milli həmrəyliyi təmin edərək Azərbaycan dövlətini güclü mövqeyə gətirib. Prezident İlham Əliyevin ardıcıl siyasəti isə ölkəmizi daha da möhkəmləndirib, müstəqilliyimizi qoruyaraq regionun lider dövlətinə çevirməyə nail olub. 2020-ci ildə 44 günlük Vətən müharibəsində qazanılan Şanlı Zəfər isə bu müstəqilliyin və dövlətçiliyin əbədiliyini bir daha təsdiqləyib.

Tədbir çərçivəsində Müstəqilliyin Bərpası Gününə həsr edilmiş videoçarx nümayiş etdirilib.

Azərbaycan Texnologiya Universiteti (ATU) Xəzəryanı Ölkələrin Universitetləri Assosiasiyasının Baş Assambleyasında təmsil olunub. Xəzəryanı Ölkələrin Universitetləri Assosiasiyasının 27-ci Baş Assambleyası Qazaxıstanın Atırau şəhərində keçirilib. Tədbirdə ATU-nun rektoru Yaşar Ömərov və elm və innovasiya məsələləri üzrə prorektor Sahil Həmidov iştirak edib. Yaşar Ömərov regional tədbirin plenar hissəsində çıxış edib. Rektor çıxışında universitetin son illərdə elm və innovasiya istiqamətində əldə etdiyi nailiyyətlərdən, elmi-tədqiqat layihələrindən, sənaye əlaqələrindən və beynəlxalq əməkdaşlıq imkanlarının genişlənməsindən danışıb.

Qeyd edək ki, tədbirdə Qazaxıstan və Azərbaycanla yanaşı Rusiya, İran və Türkmənistanın aparıcı ali məktəblərinin rektorları, alim və ekspertlər iştirak ediblər.

Baş Assambleyada Xəzər ekosisteminin qorunması, regional tədqiqat layihələrinin hazırlanması, innovativ elmi həllərin tətbiqi ilə bağlı məsələlər müzakirə olunub. Həmçinin ali təhsil müəssisələri arasında əməkdaşlıq memorandumlarının imzalanması mərasimi olub.

Forumda Xəzər regionunun davamlı inkişafına yönəlmiş birgə təşəbbüslər, həmçinin elm və təhsil sahələrində inteqrasiyanı gücləndirmək üçün nəzərdə tutulan yeni layihələr təqdim edilib.

Bu təşəbbüs SDG 17 (Məqsədlər üçün tərəfdaşlıqlar), SDG 13 (İqlim dəyişikliklərinə qarşı mübarizə) və SDG 14 (Sudan həyat) ilə bağlıdır. Xəzər ekosisteminin qorunması və regional elmi layihələrin müzakirəsi ali təhsil müəssisələrinin ortaq ekoloji məsuliyyətini önə çıxarır. Beynəlxalq assambleya formatı elm və təhsil sahəsində regional inteqrasiyanın dərinləşməsinə imkan yaradır. Bu cür əməkdaşlıq dayanıqlı inkişaf üçün ortaq elmi həllərin formalaşmasını dəstəkləyir.