ATU-Azərbaycan Texnologiya Universiteti

Xəbərlər

Universitetimizdə ən son xəbərləri buradan əldə edin.

2024-09-23

Barselona Universitetinə səfərlə bağlı məlumatlandırma günü keçirilib

Azərbaycan Texnologiya Universitetində Erasmus+ KA2 (REFRESH) layihəsi çərçivəsində Barselona Universitetinə səfərlə bağlı məlumatlandırma günü keçirilib.

Görüşdə layihə meneceri, tədris işləri üzrə prorektor Raqif Hüseynov REFRESH layihəsinin məqsədi, yerli və xarici tərəfdaşları, cari fəaliyyət planı barədə məlumat verib, daha sonra strateji inkişaf və rəqəmsallaşma məsələləri üzrə rektor müşaviri Mehman Kərimov Barselona səfərinin nəticələrini təqdim edib, əldə olunan təcrübələri bölüşüb, tədbir iştirakçılarını maraqlandıran sualları cavablandırıb.

Qeyd edək ki, Azərbaycan Texnologiya Universitetinin tərəfdaş olduğu, Avropa Birliyi tərəfindən maliyyələşdirilən, Azərbaycan Dövlət İqtisad Universitetinin koordinatorluğu ilə həyata keçirilən “Azərbaycan Universitetlərində Yaşıl və Dayanıqlı Qlobal İqtisadiyyatın Təkmilləşdirilməsi: Bərpa Olunan Enerji və İqlim Dəyişikliklərinin Azaldılması” (REFRESH) Erasmus+ KA2 layihəsi çərşivəsində Barselona Universitetininə səfər cari ilin 2-8 iyun tarixlərində baş tutub.

2024-09-20

ATU-da Elmi Şuranın yeni tədris ili üzrə iclası keçirilib

Azərbaycan Texnologiya Universitetində (ATU) Elmi Şuranın 2024/2025-ci tədris ili üzrə ilk iclası keçirilib.

Universitetin rektoru v.m.i.e., Elmi Şura sədri dos. Yaşar Ömərov kvorumu nəzərə alaraq iclası açıq elan edib, gündəlikdə duran məsələləri diqqətə çatdırıb.

Sonra tədris işləri üzrə prorektor Raqif Hüseynov yay imtahan sessiyasının nəticələri barədə çıxış edib.

Daha sonra Tədris şöbəsinin müdiri Cəsarət Şabanov yay imtahan sessiyasının keçirilməsi zamanı baş vermiş və aşkarlanmış problemlərlə bağlı çıxış edib, strateji inkişaf və rəqəmsallaşma məsələləri üzrə müşavir Mehman Kərimovun təqdimatında Apellyasiya Komissiyasının hesabatı dinlənilib.

Həmçinin, iclasda Rövşən Qasımov Avtomatika və informasiya texnologiyaları kafedrasının, Sakit Verdiyev Kompüter mühəndisliyi və telekommunikasiya kafedrasının hesabatı ilə çıxış edib, gündəlikdə olan digər məsələlərə baxılıb.

İclas çərçivəsində Magistratura və doktorantura şöbəsinin müdiri Eldəniz Bayramov 60 illik yubileyi münasibətilə təltif edilib.

2024-09-19

ATU könüllüləri ekoloji aksiya keçirib

Azərbaycan Texnologiya Universitetinin (ATU) tələbə könüllüləri Gəncə Şəhər İcra Hakimiyyətinin dəstəyi ilə Gəncəçay çayı ərazisində ekoloji aksiya keçiriblər.

Aksiya zamanı ATU könüllüləri çay yatağını məişət tullantılarından təmizləyiblər.

Ekoloji aksiya "Yaşıl dünya naminə həmrəylik ili" çərçivəsində təşkil olunub.

2024-09-16

ATU yeni tədris ilinin başlaması münasibəti ilə tədbir keçirilib

Azərbaycan Texnologiya Universitetində (ATU) yeni tədris ilinin başlaması münasibəti ilə tədbir keçirilib

Tədbir universitetin bayraq meydanında Azərbaycan Respublikasının Dövlət Himninin sədaları altında Dövlət Bayrağının qaldırılması ilə açıq elan olunub.

Daha sonra Azərbaycanın müstəqilliyi və ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.

Tədbirdə giriş sözü ilə çıxış edən Azərbaycan Texnologiya Universitetinin rektoru v.m.i.e dos. Yaşar Ömərov professor-müəllim heyəti və tələbələri yeni dərs ili münasibətilə təbrik edib, onlara uğurlar arzulayıb, universitetdə tələbələr üçün yaradılan imkanlardan danışaraq tövsiyələrini verib.

Daha sonra "Azersun Holding" MMC-nin İstedadların idarə olunması şöbəsinin müdiri Səadət Əliyeva, ATU-nun Ümumi və tətbiqi fizika kafedrasının müdiri prof. Məntiq Cəfərov çıxış edərək tələbələri yeni dərs ili münasibətilə təbrik edib.

Yeni qəbul olan tələbələrin valideynləri, bakalavriat və magistratura səviyyəsinə yüksək balla qəbul olanlar, qazi tələbələr kürsüyə çıxaraq öz ürək sözlərini deyib, tələbə adının sevincini paylaşıblar.

Sonda ATU-ya ən yüksək balla qəbul olmuş tələbələrə universitetin və "Azersun Holdinq"in hədiyyələri və tələbə biletləri təqdim edilib.

2024-09-16

Yeni auditoriya istifadəyə verilib

Azərbaycan Texnologiya Universitetinin (ATU) Qida mühəndisliyi fakültəsində yeni auditoriya istifadəyə verilib.

Həyat fəaliyyətinin təhlükəsizliyi üzrə ixtisaslaşmış auditoriya "IST Services" şirkətinin maliyyə dəstəyi ilə qurulub.

Otağın açılış lentini ATU-nun rektoru v.m.i.e. dos. Yaşar Ömərovla "IST Services" MMC-nin Baş direktoru Orxan Xəlilzadə kəsib.

Qeyd edək ki, "IST Services" ümumi SƏTƏM, yükqaldırma, transport və logistika, xilasetmə, dənizdə sağqalma, müxtəlif peşə, mühəndislik, qida təhlükəsizliyi və s. sahələrdə təlimlər həyata keçirir.

2024-09-16

ATU ilə "IST Services" MMC arasında müqavilə imzalanıb

Azərbaycan Texnologiya Universiteti ilə "IST Services" MMC arasında əməkdaşlıq müqaviləsi imzalanıb.

Sənədi Azərbaycan Texnologiya Universitetinin rektoru v.m.i.e. dos. Yaşar Ömərovla "IST Services"in Baş direktoru Orxan Xəlilzadə imzalayıb.

Əməkdaşlıq müqaviləsinə əsasən "IST Services" şirkəti ATU-nun sifarişi əsasında "Texniki təhlükəsizlik" üzrə nəzəri və praktik təlimlər keçəcək.

Qeyd edək ki, "IST Services" şirkəti ümumi SƏTƏM, yükqaldırma, transport və logistika, xilasetmə, dənizdə sağqalma, müxtəlif peşə, mühəndislik, qida təhlükəsizliyi və s. sahələrdə təlimlər həyata keçirir.