Antiinhisar və İstehlak Bazarına Nəzarət Dövlət Agentliyinin Azərbaycan Texnologiya Universiteti tələbələri ilə görüşü keçirilib.
Görüş zamanı sosial məsələlər və ictimaiyyətlə əlaqələr üzrə prorektor Şahmar Həsənov tədbirin maarifləndirici xarakter daşıdığını, verilən məlumatların həm istehlakçı hüquqlarının qorunması, həm də əmək bazarına hazırlıq baxımından tələbələr üçün əhəmiyyətli olacağını bildirərək sözü Dövlət Xidmətinin 12 saylı regional bölməsinin rəhbəri Təbriz Axundova verib. T.Axundov istehlakçıların əsas hüquqları, bu hüquqların müdafiəsi mexanizmləri, istehlak bazarına nəzarət sahəsində fəaliyyətin təşkili, o cümlədən qanunvericiliyin tələbləri barədə ətraflı məlumat verilib.
Daha sonra Dövlət Xidmətinin Standartlaşdırma, texniki tənzimləmə və sertifikatlaşdırma şöbəsinin müdiri Elməddin Quluyev tələbələr qarşısında “Keyfiyyət infrastrukturu sahəsinin iqtisadi inkişafda rolu” başlıqlı məruzə ilə çıxış edib.
Sonda xidmət rəsmiləri tələbələri maraqlandıran sualları cavablandırıblar.
Azərbaycan Texnologiya Universitetinin (ATU) təşkilatçılığı və Gəncə şəhər İcra Hakimiyyətinin dəstəyi ilə "Yaşıl dünya naminə həmrəylik ili" çərçivəsində fləşmob keçirilib.
ATU tələbələrinin iştirakı ilə ərsəyə gələn dinamik kompozisiyada yer kürəsini insanların qayğısı ilə yaşıllaşdırılmasına diqqət çəkilib.
Azərbaycan Texnologiya Universitetinin (ATU) rektoru Yaşar Ömərovun "ATS Food" MMC-nin İnzibati İşlər və İnsan Resursları Departamentinin direktoru Rafiq Süleymanovun rəhbərlik etdiyi nümayəndə heyəti ilə görüşü keçirilib.
Görüşdə rektor Y.Ömərov "ATS Food" şirkəti ilə qurulan əlaqələrin artıq real nəticələr verdiyini vurğulayaraq bundan sonrakı mərhələdə də uğurla davam edəcəyinə əminlik ifadə edib. "ATS Food" nümayəndələri mövcud əlaqələrin genişləndirilməsinə dair təkliflərini bildiriblər, eləcə də əməkdaşlığa dair qarşıda duran məsələlər, təqaüd yerlərinin artırılması, birgə tədbirlərin keçirilməsi və s. müzakirə edilib.
Qeyd edək ki, ATU ilə "ATS Food" şirkəti arasında 12 oktyabr 2023-cü il tarixində əməkdaşlıq müqaviləsi imzalanıb. Cari ilin yanvar ayında ATU tələbələri üçün "ATS Food" təqaüdləri təsis edilib, bundan başqa, "ATS Food" ATU-nun təşkil etdiyi bir çox tədbirlərdə tərəfdaş qismində çıxış edib.
Azərbaycan Texnologiya Universitetinin Qida Mühəndisliyi fakültəsinin şərabçılıq ixtisası üzrə təhsil alan tələbələrinin "Az Abrau" Şəki Şərab Zavoduna təcrübi ekskursiyası təşkil edilib.
ATU tələbələri zavodda Tələbə Elmi Cəmiyyətinin xətti ilə müasir və aktual mövzularda tədqiqatlar aparıb, daha sonra təqdimatlarla çıxış ediblər.
Ekskursiya çərçivəsində tələbələr Azərbaycan şərabçılığının tarixi ilə bağlı geniş materiallar toplayıb, eləcə də şərabçılıqda istifadə olunan yeni texnologiyalarla, istehsalat prosesinin bütün mərhələləri ilə əyani tanış olmaq və öyrənmək imkanı qazanıblar, həmçinin, zavodun texnoloqları ilə qida mühəndisliyi sahəsindəki yeniliklərə və şərabçılıq sektorunda tətbiq edilən innovasiyalara dair diskussiyalar aparıblar.
Azərbaycan Texnologiya Universitetinin Azərbaycan Respublikası Elm və Təhsil Nazirliyi ilə birgə təşkil etdiyi 8 Noyabr - Zəfər Gününə həsr olunmuş “İnnovativ ekosistemlərin inkişafında universitetlərin rolu" adlı respublika elmi-praktik konfransı 11 istiqamətdə öz işini davam etdirib.
İki günlük konfrans çərçivəsində məruzəçilər Qida mühəndisliyi və texnologiyaları, Süni intellekt, elektronika və informasiya texnologiyaları, Tekstil və yüngül sənaye, Dizaynda innovativ texnologiyalar, Maşınqayırma, nəqliyyat və logistika, Metallurgiya mühəndisliyi, Rəqəmsal iqtisadiyyat və idarəetmə, Turizm sənayesinin təşkili, Ətraf mühit, təhlükəsizlik və dayanıqlı inkişaf, Fundamental elmlər və innovativ texnologiyalar, Mültikultural təhsildə innovativ texnologiyalar olmaqda 11 bölmədə hibrid qaydada məruzələrlə çıxış ediblər.
Qeyd edək ki, konfransın məruzələr toplusuna 400-ə yaxın tezis qəbul edilib.
Azərbaycan Texnologiya Universitetində 8 Noyabr Zəfər Günü münasibəti ilə Bakı Media Mərkəzinin
Azərbaycan Respublikası Mədəniyyət Nazirliyi və Salnamə Film Studiyası ilə birgə ərsəyə gətirdiyi “Şuşa, Sən Azadsan!” sənədli filmi nümayiş etdirilib.
