ATU-Azərbaycan Texnologiya Universiteti

Xəbərlər

Universitetimizdə ən son xəbərləri buradan əldə edin.

2024-04-02

ATU-da Aprel döyüşlərinə həsr edilmiş tədbir keçirilib

Azərbaycan Texnologiya Universiteti və Vətən Müharibəsi Əlillərinə Kömək İctimai Birliyinin birgə təşkilatçılığı ilə Aprel döyüşlərinə həsr edilmiş tədbir keçirilib.

Əvvəlcə Dövlət Himni səsləndirilib, daha sonra Aprel şəhidlərinin timsalında Vətən uğrunda canından keçən Vətən övladlarının əziz xatirəsi bir dəqiqəlik sükutla yad edilib.

Tədbirdə Azərbaycan Texnologiya Universitetinin sosial məsələlər və ictimaiyyətlə əlaqələr üzrə prorektoru Şahmar Həsənov, şəhid ailələri, qazilər, professor-müəllim heyəti və tələbələr iştirak edib.

Prorektor Ş.Həsənov giriş sözü ilə çıxış edərək Müzəffər Ali Baş Komandan İlham Əliyevin rəhbərliyi ilə rəşadətli ordumuzun Aprel döyüşləri və Vətən müharibəsi zamanı həyata keçirdiyi əks-hücum əməliyyatlarının nəticələrindən danışıb, Azərbaycan bayrağının azad olunmuş Lələtəpə yüksəkliyində və Qarabağ torpaqlarında ucaldılmasının, Zəfərin xalqımıza və türk dünyasına böyük qürur və sevinc hissləri yaşatdığını vurğulayıb.

Tədbirdə şəhid ailələri və qazilərin çıxışları, xatirələri dinlənilib. Şəhidlərin döyüş meydanında göstərdikləri qəhrəmanlıqlardan, onların keçdiyi şərəfli yoldan bəhs edilib.

Tədbir çərçivəsində Aprel döyüşlərinə həsr edilmiş videoçarx izlənilib, fəallığı ilə seçilən bir qrup tələbələr təltif edilib.

2024-03-29

“Ləmbəli Oğuz Türk yurdu: dili və xalçalarındakı tarix” adlı monoqrafiya nəşr olunub

Azərbaycan Texnologiya Universitetinin Yüngül sənaye mühəndisliyi və dizayn kafedrasının professoru Cahangir Hacıyevin “Ləmbəli Oğuz Türk yurdu: dili və xalçalarındakı tarix” adlı monoqrafiyası nəşr olunub.

Monoqrafiyada türklərin böyük yayılma köçü və daxili yerdəyişmələri, köçün səbəbləri və yayılma coğrafiyası, o cümlədən Bozqurdlar, Oğuz türkləri və Pazırıq xalısındakı kodlaşdırılmış informasiyalar haqqında bilgilər yer alır.

Nəşrdə Lənbəli kəndində formalaşmış danışıq dili və Lənbəli xalçaları elmi-tədqiqat obyekti kimi götürülərək hər iki istiqamətdə mövcud materiallar üzərində araşdırmalar aparılıb, xalçaların naxış, süjet və kompozisiyalarının əsrlərlə sirr olaraq saxladığı tarixi faktlar üzə çıxarılıb.

Kitab filologiya, tarix, xalçaçılıq və dizaynla məşğul olan mütəxəssislər, ali məktəblərin müvafiq ixtisaslarında təhsil alanlar və müəllimlər üçün nəzərdə tutulub.

2024-03-28

ATU-da yeni prorektor təyin olunub

Azərbaycan Respublikasının elm və təhsil naziri Emin Əmrullayevin əmrinə əsasən Şahmar Umud oğlu Həsənov Azərbaycan Texnologiya Universitetinin sosial məsələlər və ictimaiyyətlə əlaqələr üzrə prorektoru vəzifəsinə təyin olunub.

Şahmar Həsənov 17 iyun 1981-ci ildə Gəncə şəhərində anadan olub.

2003-cü ildə Gəncə Dövlət Universitetinin Tarix fakültəsinin bakalavriat səviyyəsini, 2005-ci ildə isə magistratura səviyyəsini fərqlənmə diplomu ilə bitirib. 2005-2006-cı illərdə milli ordu sıralarında uğurla hərbi xidmət keçib. 2007-ci ildən Azərbaycan Texnologiya Universitetinin İctimai elmlər və multikulturalizm kafedrasında pedaqoji fəaliyyətə başlayıb. Eyni zamanda 2022-ci ilin sentyabrından 2024-cü ilin mart ayına qədər Azərbaycan Texnologiya Universitetinin sosial məsələlər və ictimaiyyətlə əlaqələr üzrə müşaviri vəzifəsini icra edib.

Ş.Həsənov 2022-ci ildə AMEA-nın A.A.Bakıxanov adına Tarix institutunda "Şimali Azərbaycanda Rusiya kommersiya banklarının fəaliyyəti (XIX-XX əsrin əvvəlləri) mövzusunda dissertasiya işini uğurla müdafiə edərək Azərbaycan Respublikası Prezidenti yanında Ali Attestasiya Komissiyasının 2023-cü il 1 sentyabr tarixli qərarı ilə Tarix üzrə fəlsəfə doktoru elmi dərəcəsinə layiq görülüb.

Bir neçə dəfə beynəlxalq konfrans və simpoziumlarda məruzələrlə çıxış edib. Erasmus təcrübə proqramlarında iştirak edib.

43 elmi məqalənin 2 tədris proqramının və 1 dərs vəsaitinin müəllifidir.

Rus, ingilis və türk dillərini bilir. Ailəlidir, iki övladı var.

2024-03-28

Universitetimizə təyin edilən yeni prorektor kollektivə təqdim edilib

Azərbaycan Texnologiya Universitetinin rektoru v.m.i.e dos.Yaşar Ömərov yeni təyinatla bağlı nazirliyin əmrini kollektivin diqqətinə çatdırıb və bildirib ki, Azərbaycan Respublikasının elm və təhsil naziri Emin Əmrullayevin əmrinə əsasən Şahmar Umud oğlu Həsənov Azərbaycan Texnologiya Universitetinin sosial məsələlər və ictimaiyyətlə əlaqələr üzrə prorektoru vəzifəsinə təyin olunub. Yaşar Ömərov Ş.Həsənova fəaliyyətində uğurlar azru edib.

Ş.Həsənov öz növbəsində ona göstərilən etimatı doğruldacağını bildirib, universitetin inkişafı istiqamətində bütün səylərini birləşdirərək bundan sonra da əzmlə çalışacağını qeyd edib.

Kollektiv Ş.Həsənovu təbrik edib, yeni vəzifədə yeni-yeni nailiyyətlər diləyib.

2024-03-21

Azərbaycan Texnologiya Universitetində (ATU) Novruz şənliyi təşkil olunub

Tədbiri rektor v.m.i.e. dos.Yaşar Ömərov, Gəncə şəhər İcra Hakimiyyətinin Başçısı Niyazi Bayramov, YAP Gəncə şəhər Təşkilatının sədri Bayram Aslanov və digər rəsmilər, qazilər, ATU əməkdaşları və tələbələr izləyiblər.
Tədbirdə müxtəlif ansamblların, eləcə də ATU tələbələrinin ifasında müsiqilər səsləndirilib, rəqslər ifa edilib.
Şənlik çərçivəsində universitetin həyətində Novruz adət-ənənələrini əks etdirən süfrələr qurulub, tələbələrin əl işlərindən ibarət rəsm sərgisi nümayiş olunub, eləcə də səməni müsabiqəsi və tələbələr arasında kəndirdartma yarışı keçirilib. Novruzun personajları olan Kosa və Keçəl tədbirə bayram əhval ruhiyəsi qatıb.
Şənlikdə tədbirin fəxri qonaqları olan qazi tələbələr və məzunlar rektor v.m.i.e. dos. Yaşar Ömərovla birgə bayram tonqalını alovlandırıblar.
ATU əməkdaşları və tələbələri tonqal ətrafında yallı gedib, rəqs ediblər.

2024-03-15

ATU-da "Narkotikə yox deyək" mövzusunda maarifləndirici görüş keçirilib

Tədbirdə ATU-nun sosial məsələlər və ictimaiyyətlə əlaqələr üzrə müşaviri Şahmar Həsənov, Gəncə şəhər Narkoloji Dispanserin baş həkimi Etibar Xəlilov, Gəncə şəhər Baş Polis İdarəsinin Narkotiklərlə mübarizə bölməsinin rəisi polis mayoru Rəşad Musayev, universitetin professor-müəllim heyəti və tələbələr iştirak edib.

Tədbirdə Şahmar Həsənov çıxış edərək bildirib ki, gəncləri sağlam həyat tərzinə təşviq etməkdə, narkomaniyanın mənfi təsirləri ilə bağlı maarifləndirmə işlərinin aparılmasında, xalqımızın milli dəyərlərinə, düşüncəsinə zərbə vuran hərəkətlərdən qorunmasında bu cür maarifləndirmənin aparılması təqdirəlayiqdir.

Etibar Xəlilov mövzunun əhəmiyyətindən, narkomaniyanın gənclərin şəxsiyyətininin, sağlamlığının inkişafına göstərdiyi mənfi təsirlərdən bəhs edərək, bu bəladan qorunmanın vacibliyini qeyd edib.

Rəşad Musayev narkomaniyanın törətdiyi fəsadlardan danışıb, gənclərə bu kimi zərərli vərdişlərdən uzaq olmağı tövsiyə edib.

Sonda tələbələrin sualları cavablandırılıb.